حادثة محور التعمير بالاسكندرية-شاهد عيان بالصور
السلام عليكم ورحمه الله وبركاته
امس كنت مع اولادي بوسط الاسكندرية واثناء عودتي للعجمي دائما ما اسلك طريق محور التعمير لسرعة الوصول من وسط الاسكندرية للعجمي من خلاله
واثناء عودتي في حوالي الحادية عشر مساء ورغم اني كنت ماشي على سرعة عالية نسبيا حوالي 140 وعشان حافظ الطريق كويس وعارف بوجود مطب هوا اعلى الكوبري وقبل ماهدي لقيت بي ام 316 (دبانة) معدية من جنبي بسرعة عالية وصوت موتورها وشكمانها يصم الاذن وواضح انه ماكنش ماشي اقل من 190 او 200
المهم هديت عشان المطب اللي فوق الكوبري وانا نازل لقيت صوت مرعب وعفرة جامدة
واصوات معدنية وطبعا عشان الطريق في الحتة دي بياخد مطلع وبعد كدة بيستوي تمهيدا لخروجنا مخرج الكيلو 21 لقيت الكارثة قدامي
البي ام اتقلبت مالايقل عن 5 او 6 قلبات متطايرة من اقصى اليمين لاقصى الشمال لدرجة انها وقعت عامودين نور من اللي في الجزيرة الوسطى وتنت التالت وعامود نزل على الجزيرة والتاني قطع الطريق المعاكس والحمد لله ماكنش في عربية تحتة بس صوت الفرامل كان عنيف جدا للعربيات الي جاية في الاتجاة الاخر
البي ام طيرت حجر تقيل نزل على الزجاج الامامي والقايم لنيسان صني وخليتها تلف حوالين نفسها لكن محصلهاش حاجة
سيارة فورد قديمة بتاعت نقل الخشب طار صندوق العدة فيها والاكصدام المعدني لكنها خاف من المسائلة وجري
البي ام نفسها كانت الكارثة رغم ان العربية دي بتصنف انها من ائمن السيارات واقواها الا انها تحولت لقفص حديدي لركابها الثلاثة
راكبين بالامام واخر خلفي
ساعة كاملة قضيتها انا والاخوة السائقين نحاول بكل جهدنا انقاذهم لانها كانو احياء ولكنها قفص حديدي فعلا
التابلوة عصر رجل السائق
الراكب الامامي قدمه اليمنى مكسورة ومحشورة
والراكب الخلفي كسر واضح بالرقبة والجمجمه
دقائق تمر في محاولات مضنية لاخراجهم مع الاسعاف وفشلنا جميعا
وسط اناس ممكن يعملو كوارث اللي عايز يش رجل الراكب الامامي المكسورة
واللي هايكسر السقف على دماغهم بعتلة ومش هايعمل حاجة اكتر من انه يطبق السقف اكتر
ناس بتقف صف تالت عشان تنزل تتفرج فقط واحنا عايزين نمشي الطريق عشان عربية المطافي توصل
ولما وصلت اكتشفنا انها معاهاش مقص كهربا
واضطرينا نمشي الطريق اكتر واسرع وسط شخط وعصبية في اللي بيهدو يتفرجو ويقفو الطريق وراهم
عربية الدفاع المدني اتحركت وسامعين صوتها ودي الوحيدة اللي معاها مقص كهرباء
جت وبدء قص قوائم السقف واخراج المصابين الثلاثة احياء والحمد لله
يا فرج الله الحمد لله خرجو احياء بعد ساعة نص كاملة بسمعهم انينهم ومش عارف تعملهم حاجة غير الدعاء
اخيرا
السرعة مالهاش كبير
مفيس سيارة ائمنة 100%
اعمل حساب للطريق لو انت مش حافظة وعارف مصايبة
بذكر نفسي واياكم بخطورة السرعة ومفاجئات الطريق
لو شفت حادثة ارجوك واتوسل اليك ماتهديش تتفرج
يا تركن بعدها تساعد وانت موسع الطريق حتى لو ركنت بعد 500 متر
يا تشد شوية وتوسع الطريق لغيرك يساعدهم لانك بتعطل الاسعاف عنهم
وقانا الله واياكم شر الحوادث
اترككم مع الصور ومعذرة فيها مشاهد عنيفة للعظة
http://img43.imageshack.us/img43/768...0423235823.jpg http://img855.imageshack.us/img855/8...0423235833.jpg
http://img101.imageshack.us/img101/9...0423235844.jpg
http://img811.imageshack.us/img811/7739/img8361j.jpg
http://img535.imageshack.us/img535/882/img8362l.jpg
http://img827.imageshack.us/img827/2866/img8363zz.jpg
http://img28.imageshack.us/img28/2615/img8364m.jpg
http://img713.imageshack.us/img713/7615/img8365y.jpg
http://img580.imageshack.us/img580/4537/img8366v.jpg
http://img688.imageshack.us/img688/8665/img8367j.jpg
http://img821.imageshack.us/img821/4978/img8368s.jpg
http://img191.imageshack.us/img191/6484/img8369u.jpg
http://img576.imageshack.us/img576/8339/img8370g.jpg
http://img21.imageshack.us/img21/4114/img8371g.jpg
http://img19.imageshack.us/img19/3379/img8373x.jpg
http://img847.imageshack.us/img847/3566/img8374a.jpg
http://img841.imageshack.us/img841/1550/img8375q.jpg
http://img16.imageshack.us/img16/4632/img8376lx.jpg
http://img190.imageshack.us/img190/6586/img8377p.jpg
http://img839.imageshack.us/img839/9810/img8378y.jpg
http://img694.imageshack.us/img694/8230/img8379w.jpg
http://img822.imageshack.us/img822/4562/img8381i.jpg
http://img713.imageshack.us/img713/5241/img8382s.jpg
http://img96.imageshack.us/img96/9683/img8386o.jpg
http://img10.imageshack.us/img10/6593/img8387nv.jpg
http://img864.imageshack.us/img864/526/img8388u.jpg
http://img193.imageshack.us/img193/5615/img8389h.jpg
